ОРШИЛ
Жинхэнэ нэр нь Мокий Демьянович Каращенко юм.
Тэр бол үл үзэгдэх фронтын нэгэн дайчин билээ. Аугаа их Эх орны дайны жилүүдэд зөвлөлтийн чекист энэ хүн хар санаатай, харгис хэрцгий, хашир догь дайсантай амь өрсөн, хүнд ширүүн нөхцөлд тэмцэн тулалдаж явсан юм.
Энэ нь дуулиан чимээгүй боловч тун хэцүү тулалдаан байв. Эдгээр хэцүү ширүүн тулалдааны явц, үр дүнг туужийн баатрын шадар дарга нараас өөр хэн ч мэддэггүй байсан юм. Энэ төлөв даруу хүний байгуулсан гавьяаг дайны дараа ч түүний айл хөршийнхэн нь ч, ойр дотных нь нөхөд ч, тэр битгий хэл гэр орныхон нь ч мэддэггүй, тийм юм хийсэн гэж бодоогүй байв.
Манай оронд фашистуудын тагнуулын албаны шургалуулан оруулсан туйлын аюултай олон тагнуул туршуул, хорлон сүйтгэгчдийг илрүүлэн устгахад үлэмжхэн тус хүргэсэн энэ сөрөг тагнуулчийн тухай өгүүлэх цаг нэгэнт болжээ.
Энэ туужид бичигдсэн үйл явдал одоогоос 30 гаруй жилийн өмнө болсон юм. Гэлээ ч гэсэн дайсны ар талд чекистүүдийн хийж байсан ажлын шинж чанар, арга барил, нарийн ширийн зүйлүүдийг тэр болгон нэгд нэггүй бичиж бас л хараахан болохгүй байна. Олон юмы нь нууцалж байх ёстой. Ийм учраас энэ туужид гарах зарим хүний нэр усыг өөрчилж, Мокий Демьяновичийн байлдааны намтрын зарим зүйлийг бичсэнгүй.
Хэдий тийм боловч эл туужийг зохиогчид Зөвлөлтийн сөрөг тагнуулчийн үйл ажиллагааг бодит баримтад тулгуурлан бичсэнийг өгүүлсүгэй.
